पार्टीलाई घाटामा पुर्याएको आरोप लाग्ला

लालध्वज (उहाँलाई यही नाम प्यारो भएर होला टि्वटरमा प्रयोग गर्नुभएको छ) जीले पार्टीको काममा गएको हेलिकप्टर खर्च पार्टीले वेहोर्छ भन्नुभएको छ। पार्टीले भर्खरै निर्वाचन आयोगमा बुझाएको हिसाब किताबमा पार्टीसँग १७ लाख रुपैयाँ मात्र छ। दिनदिनै हेलिकप्टरमा उडेकै उडै हुनुहुन्छ। त्यो १७ लाख त हेलिकप्टरमा उड्दा दुई दिन मै सकिन्छ रे। आफू प्रधानमन्त्री भएका बेला पार्टीलाई घाटामा लगेको आरोप लाग्ला है....

चाहेकै त्यही हो

सार्वजनिक यातयातमा कोही पनि बोलेनन् भने त्यो दिन साह्रै खल्लो लाग्छ। आज चाहिँ प्रधानमन्त्रीले 'युद्धका घटना ब्युँताउने र एकले अर्कालाई मुद्दा लगाउँदै जाने हो भने काङ्ग्रेस एमालेका नेता नि बाँकी रहदैनन्' भनेको सुनेका कान्तिपुर यातायातका चालकले भन्दै थिए, 'चाहेकै त्यही हो नि अहिलेका चाहे माओवादीका हुन् चाहे काँग्रेस एमालेका कोही नि नेता बाँकी नरहुन्।'

महिला ग्राहकका लागि रेष्टुरेन्टमा छुट्टै तला

महिला हिंसाका समाचार पढिरहेका बेला बनेपाको नेवा किचन रेष्टुरेन्टमा जान पाइयो। रेष्टुरेन्टले महिलाहरूका लागि एउटा छुट्टै तलामा खाने व्यवस्था गरेको रहेछ। तर मदिरा र चुरोट पिउने महिलाहरुलाई भने अलिक अप्ठेरो पर्दोहोला, No smoking, No Drinks Please लेखेको छ।

पोखरामा भेटिएका रेडियो पत्रकार

'लाइसेन्स त बोक्दै बोक्दिन, कहिलेकाहीँ कुनै ट्राफिकले ब्लु-बुक खोस्यो भने यहाँका ट्राफिक हाकिमलाई फोन गर्छु। भोलिपल्ट ट्राफिक प्रहरीले अफिसमै ब्लुबुक ल्याइदिन्छन्,' सुशासन सम्बन्धि रेडियो कार्यक्रम बनाउने एक जना रेडियो पत्रकार भेटिएका थिए पोखरामा। अजब नेपाल, गजब नेपाल...

फेसबुक स्टाटस बेचेर पैसा

आजको The Himalayan Times पत्रिकामा देखेको विज्ञापन : Wondering what to update as your FACEBOOK STATUS? type FBS and send it to 3131.
मैले SMS पठाएको चार रुपैयाँ खर्च भो तर रिप्लाई भने आएन। तै मनमा लागेको कुरा- बाठा मान्छेले फेसबुक स्टाटस पठाइदिन्छु भनेर नि पैसा कमाएकै छन् र, संसारमा जे पनि बेच्ने र किन्नेका कमी छैन।