चुनाव भइहाले कसलाई देखाएर भोट माग्ने होला यिनले ?

यसो सोच्छु, माओवादीले विगतमा प्रचण्ड/बाबुराम देखाएर चुनाव लडे र राम्रो मत ल्याए। काँग्रेसले उहिले बिपी/किसुनजी/गणेशमान देखाएर चुनाव लडे र कहिले दुई तिहाई त कहिले बहुमत ल्याए। कहिले मदन भण्डारी र कहिले मनमोहन देखाएर एमालेले चुनाव लड्यो र गतिलो मत ल्यायो। पहिले उपेन्द्र यादव देखाएर मधेशीले मत ल्याए। यस पटक अब यिनले कसलाई देखाएर मत माग्ने होलान् ? कोही बचाएर राखेका छन् कि। जनताले प्रचण्ड/बाबुराम हेरेर माओवादीलाई भोट देलान्? सुशील कोइराला/शेरबहादुर देउवा हेरेर काँग्रेसलाई भोट देलान्? झलनाथ खनाल/माधव नेपाल हेरेर एमालेलाई भोट देलान्? चुनावमा मत (जनता) आकर्षित गर्न विचार, दर्शन, योजना मात्र भएर पुग्दैन। जनताले विश्वास गर्ने नेतृत्व पनि दिन सक्नुपर्छ।